Шығыс Қазақстандағы республикалық, облыстық және аудандық маңызы бар автокөлік жолдары мен елді мекен көшелерін қысқы күтіп-ұстау жұмыстарына барлығы 806 арнайы техника тартылған. Төтенше жағдайлар кезінде пайдалануға арналған 185 қосымша мобилизациялық техника бар.
— Қыс басталғалы өңірде ауа райының қолайсыздығына байланысты 37 рет жол жабылды. Оған қалың қар жаууы, жолдың нашар көрінуі және қатты аяз себеп болған. Республикалық жолдар 20 рет, ал облыстық жолдар 17 рет жабылған, — дейді ШҚО жолаушы көлігі және автомобиль жолдары басқармасы басшысының міндетін атқарушы Ернар Мәулетханов.
Жолдардың орташа жабылуы 10 сағатқа созылды.
Осы ретте, көлік жүргізушілеріне қала сыртындағы тасжолға шыққанда ауа райы жағдайы мен көліктің техникалық күйін ескеру қажеттігі ескертілді.