Бүгін облыстық мәслихаттың жиырма алтыншы сессиясына Шығыс Қазақстан облысының әкімі Нұрымбет Сақтағанов қатысты. Өз сөзінде ол сыбайлас жемқорлыққа қарсы іс-қимыл маңызына тоқталды.
— Мемлекет басшысы Қасым-Жомарт Кемелұлы Тоқаев «ЗАҢ мен ТӘРТІП – мемлекетіміздің мызғымас тұғыры» деп әрдайым айтып келеді. Бұл – қоғамдағы тұрақтылықтың, азаматтардың құқықтары мен қауіпсіздігінің, еліміздің даму бағытының негізі. Осы қағидатты басшылыққа ала отырып, біз сіздермен бірге әрбір бастамамызда заңның үстемдігін қамтамасыз етуге, қоғамдық тәртіпті нығайтуға және азаматтардың мемлекеттік институттарға деген сенімін арттыруға міндеттіміз. Кез келген фактілерді мұқият қарап, құзырлы органдарға жолдайтын боламыз. Кеше болған жағдай – біздің жемқорлыққа қарсы ұстанымымыздың дәлелі, — деді аймақ басшысы.
Еске салсақ, кеше ШҚО жолаушы көлігі және автомобиль жолдары басқармасының басшысы қызметінен кеткені хабарланған. Шнайдер көпіріндегі апаттан кейін аймақ басшысының протоколдық тапсырмасымен құқық қорғау органдарының қатысуымен көлік саласына кешенді тексеріс жүргізілді. Жедел-іздестіру шараларының нәтижесінде Д.Уахитовтың заңға қайшы әрекеттері анықталған.