Өскеменде ЖРВИ жұқтырғандар көбейгендіктен ата-аналарға балаларын ойын алаңына апармау ұсынылды

Қаладағы қоғамдық орындарда санитарлық талаптардың сақталуына бақылау күшейтілмек. Бұған ЖРВИ жұқтырғандар санының күн санап өсіп бара жатқаны себеп болып отыр.
Қазіргі уақытта облыста инфекцияға 63 мыңнан астам адам шалдықса, оның жартысынан көбі – 14 жасқа дейінгі балалар. Науқастар саны қала, аудандар ішінде Өскеменде ең көп тіркелген.
— Соңғы аптада эпидемиологиялық жағдай нашарлап кетті. Тұмаумен қатар паравирус, аденовирус, коронавирус та тарап жатыр. Білім беру ұйымдарында санитайзерлерді қайта қойып, санитарлық талаптардың орындалуын күшейту қажет. Әсіресе асханалар мен балалар ойын алаңдарын бақылау керек, — деді қала әкімі Алмат Ақышов.
Осы ретте, ата-аналарға балаларын ойын алаңына апармау ұсынылды. Дәрігерлер тұрғындарға өз бетімен емделмей, ауру белгілері байқалған жағдайда бірден медициналық мекемеге жүгінуге кеңес берді.