Ауа райының күрт бұзылуына, нақты айтқанда, температураның төмендеуі мен қардың көп жаууына байланысты ШҚО Полиция департаменті халықтан көліктерінің техникалық жағдайына және олардың қыс мезгіліне дайындығына ерекше назар аударуды сұрады.
— Елді мекендерден тыс жерлерге шыққанда жылдамдық режимін, басып озу және қарсы бағытқа шығу ережелерін қатаң сақтаңыздар. 1 желтоқсаннан бастап маусымдық шиналарды уақытылы ауыстырмаған жүргізушілер әкімшілік жауапкершілікке тартылады. Құрметті жүргізушілер! Жол қозғалысы ережелерін сақтау – өзіңіздің және өзгенің өмірі мен қауіпсіздігінің кепілі, — деп хабарлады департаменттің баспасөз қызметінен.
Айта кетейік, 5 қарашада Өскеменде алғашқы қар жауды. Көлік жүргізушілерінің көбі дөңгелектерін қыстыққа айырбастап үлгермегендіктен және көліктер арасындағы арақашықтықты сақтамаудың салдарынан бір күнде талай жол апаты болды. Негізінен Өскеменде бір күнде орташа есеппен 10, ары кетсе 15 жол апаты болатын. Ал қар жауған соң бір күнде 23 жол-көлік оқиғасы тіркелді.