Шығыс Қазақстандағы туризмді дамыту мәселелері Қазақстан Республикасы Парламенті Сенаты мен Ресей Федерациясының Федерация Кеңесі арасындағы ынтымақтастық жөніндегі комиссияның 24-ші отырысында негізгі тақырыптардың бірі болды. Қатысушылар әлем альпинистерінің басты тартылыс нүктелерінің бірі саналатын Белуха тауы бойындағы трансшекаралық маршруттарға ерекше назар аударды.
Ресей тарапының деректеріне сәйкес, биылғы маусымда ғана Ресей аумағынан 900-ден астам адам шыңға көтерілген. Алайда Қазақстан жағындағы маршруттар жеңілдеу әрі туристердің кең ауқымы үшін қолжетімді болғанмен әлі де болса сұраныс аз болуда. Сондықтан олардың дамуына деген көзқарасты қайта қарап, барынша қолайлы әрі қауіпсіз ету ұсынылды.
ҚР Парламенті Сенаты Төрағасының орынбасары Жақып Асанов өткен жылдың қарашасында Қазақстан мен Ресей Президенттерінің қатысуымен өткен форумда трансшекаралық маршруттар туралы құжатты жедел қабылдау жөнінде тікелей тапсырма берілгенін еске салды.
«Ресей тарапы барлық қажетті материалдарды әзірледі. Ендігі сөз Қазақстан жағында. Бұл процесті созудың қажеті жоқ, – деді ол.
Отырыс қатысушылары Белуханы халықаралық туристік нысан ретінде дамыту Шығыс Қазақстандағы туризм саласына қуатты серпін беретінін атап өтті. Өңір бірегей табиғатымен ерекшеленеді, инфрақұрылым қарқынды дамып келеді, ал трансшекаралық ынтымақтастыққа жүйелі көзқарас Алтай әлеуетін жаңа деңгейде ашуға мүмкіндік береді.