Шығыс Қазақстан облысы Марқакөл ауданы депутаттарының өтінішінен кейін Экология департаментінің мамандары Ақбұлақ ауылдық округіне қарасты «Шаңды» жер учаскесінде тексеру жүргізді.
— Тексеруге Ертіс бассейндік инспекциясының су ресурстарын пайдалану мен қорғауды реттеу жөніндегі мамандары, Кәсіпкерлік және индустриялық даму басқармасы, «Шығысқазнедра» Шығыс Қазақстан өңіраралық геология департаментінің өкілдері тартылды. Соның барысында ҚР экологиялық заңнамасын бұзу фактілері анықталды, — деп хабарлады ШҚО Экология департаментінің баспасөз қызметінен.
Осылайша, жеке тұлға Айқын Ардагер ӘҚБтК-нің 358-бабы 2-бөлігі, 332-бабы 1-бөлігі, 328-бабы 4-бөлігі бойынша әкімшілік жауапкершілікке тартылды. Іс материалдары сотқа жолданды.
Сонымен қатар жиналған материалдар Марқакөл ауданының құқық қорғау органдарына және өзге де құзыретті мемлекеттік органдарға тиісті шаралар қабылдау үшін жіберілді.
