ШҚО-да 1 қыркүйектен күзгі әскерге шақыру науқаны басталады

Науқан еліміздің өзге өңірлеріндегі сияқты 31 желтоқсанға дейін созылады. Осы аралықта өңір бойынша шамамен 800 жас әскерге шақырылмақ. Бұл туралы ШҚО Қорғаныс істері жөніндегі департаменті бастығының орынбасары Жәнібек Сапаров Өңірлік коммуникациялар қызметінде өткен брифинг барысында мәлімдеді.
— «Әскери қызмет және әскери қызметшінің мәртебесі туралы» заңға сәйкес, мерзімді әскери қызметке кейінге қалдыру немесе босатылу себептері жоқ 18 бен 27 жас аралығындағы ер азаматтар шақырылады. Қызмет ету мерзімі — 12 ай. Биыл науқанды ұйымдастыру мақсатында Шығыс Қазақстанда 10 шақыру және медициналық комиссия жұмыс істейді. Облыстан әскерге алынған жігіттер елдің барлық аймақтарына жіберіледі, — деді ол.
Әскери шақыру кезең-кезеңімен цифрлық форматқа көшіріліп жатыр.
— Әскерге шақырылушыларға хабарламалар SMS арқылы және eGov порталының жеке кабинеті арқылы жолданады. Медициналық комиссияға келмегені немесе әдейі жалтарғаны үшін әкімшілік және қылмыстық жауапкершілік бар. Нақты айтқанда, айыппұлдан бастап, бір жылға дейін бас бостандығынан айыруға дейінгі жаза қарастырылған, — деді Жәнібек Сапаров.
Қорғаныс министрлігі әскери қызметтің тартымдылығын арттыру бағытында жұмыс жүргізіп жатыр.Елдің 80-нен астам жоғары оқу орнымен жасалған келісім аясында әскери қызметін абыроймен өткеріп, жақсы нәтиже көрсеткен азаматтар университетке емтихансыз, оқу орнының есебінен қабылданады. Жігіттерді бөлу кезінде олардың білімі, кәсіби дайындығы, денсаулығы, отбасылық жағдайы және жеке қалау ескеріледі.