Шығыс Қазақстанда теміржол бойында қайғылы оқиға тіркелді. 22 тамыз күні сағат 10:20 шамасында Коршунов-Өскемен-1 бағытындағы теміржол учаскесінде пойыз екі әйелді қағып кетті.
Оқиға орнында бір әйел тіл тартпай кетсе, екіншісі ауыр жарақатпен шұғыл түрде ауруханаға жеткізілді. Бұл туралы «Қазақстан темір жолы» ұлттық компаниясының баспасөз қызметі хабарлап отыр.
— Пойыз машинисі жолда тұрған адамдарды байқап, шұғыл тежеуге әрекеттенген. Алайда пойызды тоқтатып үлгеру мүмкін болмады. Қайғылы оқиға салдарынан бір адам көз жұмып, тағы біреуі жарақат алды, — делінген хабарламада.
Компания марқұмның туыстарына көңіл айтып, зардап шеккен әйелдің тезірек сауығып кетуіне тілектестік білдірді.