Шығыс Қазақстан облысында бюджет қаржысы қайта бөлінген соң аудандық және облыстық ауруханалардағы жөндеу жұмыстарын аяқтауға және сирек кездесетін ауруларға шалдыққан науқастарды дәрі-дәрмекпен қамтамасыз етуге мүмкіндік туды.
Осылайша, Өскемендегі облыстық арнайы медицина орталығының урология бөлімшесі жаңғыртылып, Зайсан ауданында мәйітхана жаңартылып, жұқпалы аурулар бөлімі жөнделеді.
— Инфекциялық бөлімше тым ескі, іштегі жабдықтар тозған. Шұғыл түрде жөндеу қажет. Егер билік уәде еткендей бәрі іске асса, онда ем алу әлдеқайда жайлы болады, — дейді жергілікті тұрғындар.
Сонымен қатар Тарбағатай ауданында аурухана мен емханадағы ескі жылу және сумен жабдықтау жүйелері жаңартылады. Ал Күршімде стационардың екі қабаты мен мәйітхана ғимаратына күрделі жөндеу жүргізіледі.
— Бірнеше жылдан бері жөндеуді күтіп тұрған медициналық мекемелер бар. Бұл — пациенттердің қауіпсіздігі мен медицина қызметкерлерінің жұмыс жағдайы үшін маңызды. Сол үшін қаражатты осы салаға бөлуге тырыстық, — деп хабарлады облыстық мәслихаттан.
Дәрі-дәрмекпен қамту мәселесі де өзекті. ШҚО Экономика және бюджеттік жоспарлау басқармасының мәліметінше, орфандық аурулармен ауыратын пациенттерді дәрімен қамтамасыз етуге 358 млн теңгеге жуық қаржы бөлінген.
Мұндай науқастарды емдеу қымбат тұратын арнайы препараттарды қажет етеді. Оларды баламамен алмастыру мүмкін емес. Қазіргі таңда өңірде 13 ересек және 41 бала осындай дәрілерді алып отыр.
— Мұндай диагнозы бар науқастар үшін дәрі ішудегі азғантай үзілістің өзі ауыр зардаптарға әкеліп соғуы мүмкін. Сондықтан дәрімен қамтудағы қаржыландыру мәселесі әрдайым аса өзекті, — деп хабарлады облыстық Денсаулық сақтау басқармасынан.
