Өскемен қаласы (Шығыс Қазақстан облысы) Сол жағалауындағы пробация қызметінде Қазақстан Республикасының «Конституцияның отыз жылдығына байланысты амнистия туралы» Заңы аясында алғашқы іс қаралды.
Амнистия шеңберінде оң шешім қабылданған Р. есімді сотталған азамат бұл заңды қолдану процесінде көмек көрсеткен пробация қызметкерлеріне шын жүректен алғысын білдірді.
«Пробация қызметкерлеріне кәсібилігі, мұқияттылығы және нақты түсіндіру жұмыстары үшін алғысымды білдіремін. Олардың қолдауының арқасында бұл жолды абыроймен өтеуге мүмкіндік алдым», — деді сотталған азамат.
Бүгінде Өскемен қаласының Сол жағалауы бойынша пробация бөлімінде 164 сотталған есепте тұр. Олардың ішінде 44 адам амнистияға ілігеді.
Сол жағалаудағы пробация бөлімінің бастығы, капитан Ерасыл Төлегенов бұл жағдайға пікір білдірді:
«Амнистия заңы — бұл жаза мерзімінен босатылу ғана емес, жаңа өмірге мүмкіндік. Біз, пробация қызметкерлері, сотталғандарды әр кезеңде сүйемелдеп, заңды түсіндіру жұмыстарын жүргіземіз және барлық талаптардың сақталуын қадағалаймыз. Амнистия әсіресе әлсіз топтағы азаматтар үшін маңызды — бұл қоғамға толыққанды оралуға берілген мүмкіндік», — деді ол.
Амнистия заңы облыс бойынша жоспарлы түрде жүзеге асырылып жатыр. Пробация қызметтері әрбір істі жеке қарап, заң талаптарына сай кешенді құқықтық және әлеуметтік жұмыс жүргізуде.
