Ұлан ауданы Асубұлақ ауылындағы бір көшенің тұрғындары су сапасына шағымданды. Олардың айтуынша, суға дезинфекция жүргізілгеннен кейін хлордың иісі танауды жарып, талай адам улану белгілерін сезінген.
Жергілікті тұрғындардың сөзінше, 14 маусымда Казаченко көшесінде су колонкаларын жоспарлы түрде дезинфекциялау жұмыстары жүргізілген. Осыдан кейін су ішуге жарамсыз болып қалған. Себебі хлордың иісі қатты сезіліп, су ішкендердің кейбірінің жүрегі айныған.
– Бұл көшеде шамамен 30 отбасы тұрады. Бізге алдын ала ешкім ескерткен жоқ. Бұл суды ішу мүмкін емес, – деп тұрғындар наразылығын шақты.
Ауыл әкімдігі жоспарлы түрдегі дезинфекцияның жиі өткізілетінін түсіндірді. Қазіргі жағдайда таза ауызсуды жеткізу ұйымдастырылған.
– 13 маусымда «Жәрдем KZ» ЖШС ауыл әкімдігі балансында тұрған су колонкаларын жоспарлы түрде дезинфекциялады. Дезинфекция хлорлы таблеткаларды қолдану арқылы санитарлық нормаларға сәйкес жүзеге асырылды. Келісімшарт бойынша, колонкалардан су ішуді дезинфекциядан кейін 4 сағаттан соң бастауға болады. Барлық жағдай анықталғанша, ауызсуды жеткізу ұйымдастырылды, – деп мәлім етті Асубұлақ ауылдық округі әкімдігінің аппаратынан.