ШҚО Экономикалық тергеу департаментінің мәліметіне сүйенсек, ең ірі алаяқтық схемаларға барғандар — «Chia Tai-Tianqing Pharmaceutical» пен «Eolus». Олар тек облыста емес, бүкіл ел аумағында әрекет еткен.
Қаржылық пирамидалардан зардап шеккендер жылдам әрі оңай ақшаны уәде берген алаяқтарға сеніп қалған. Барлығы 250-ден астам өңір тұрғыны 400 млн теңгеден астам шығынға батқан. Сонымен қатар облыста алаяқтарға банк карталары мен жеке деректерін беру, яғни «дропперлік» мәселесі де өзекті болып отыр.
— Тек Шығыс Қазақстан облысының өзінде 6,2 мыңнан астам «дроп-карта» анықталды. Бұл карталар арқылы 24 млрд теңгеге жуық қаржы айналымы тіркелген. Көп жағдайда «дропперлер» қатарына студенттер, зейнеткерлер және жұмыссыз азаматтар кіреді. Олар өздерінің қылмыстық схемаға қатысып жатқанын түсінбейді, — дейді департаменттің ұйымдастыру-бақылау басқармасының басшысы Жанар Тайғаранова.
Оның айтуынша, қаржы пирамидаларын ұйымдастырушыларға қатысты сот үкімі шығарылып, айыпталушылар бас бостандығынан айырылды.