Шығыс Қазақстан облысында оқу жылын 98 мыңнан астам оқушы аяқтайды. Оның ішіндегі 4430-ы — мектеп түлегі.
Өңірде 343 мемлекеттік мектеп бар. Онда білім алып жатқан 4430 оқушы биыл 11-сыныпты, ал 9104 оқушы 9-шы сыныпты аяқтайын деп отыр. Бұл туралы ШҚО Білім басқармасының басшысы Инесса Чернышева мәлім етті.
— Тоғызыншы сыныптың мыңға жуық оқушысы ерекше үлгідегі аттестат алуға үміткер, ал 3 724 оқушы колледжге түсуге шешім қабылдаған. Жоғары сыныптар арасындағы 368 түлек «Алтын белгіге», 403 оқушы үздік аттестатқа үміткер. 3 342 түлек жоғары оқу орындарына, ал 316 түлек колледжге түспек, — дейді ол.
Облыста ҰБТ-ға қатысу белсенді түрде жүріп жатыр. Мектеп бітірушілердің 84%-ы тестілеуге қатысуды ұйғарған. Олардың 90%-ы сынақ тестілеуінен өтіп үлгерді.
— Емтихандар кестесі: 9 (10) сыныптар үшін 29 мамырдан 10 маусымға дейін, 11 (12) сыныптар үшін — 30 мамырдан 16 маусымға дейін. Бастауыш сынып оқушылары да демалмайды, мамыр айының соңында қазақ тілі мен әдебиетінен қорытынды аттестация тапсырады, — дейді Инесса Чернышева.
Бірінші сыныпқа қабылдауға тіркеу басталып, тамыздың соңына дейін жалғасады. Қазіргі таңда 9 729 болашақ оқушының 6 166-сынан өтініш түскен.