Алтай ауданында патрульдік полиция батальонының инспекторлары көше патрульдеу барысында кенеттен өзін жайсыз сезініп, есінен танып жерге құлаған ер адамды байқаған.
— Бір сәтке де кідірместен полиция капитаны Ринат Қуаниязов пен полиция аға лейтенанты Сырым Қалиқан алғашқы медициналық көмек көрсетіп, жедел жәрдем шақырған. Алайда азаматтың жағдайының ауырлығын ескеріп, оны дер кезінде жақын маңдағы ауруханаға өз көліктерімен жеткізуді ұйғарған, — деп хабарлады ШҚО ПД баспасөз қызметінен.
Медицина қызметкерлері 70 жастағы зейнеткерге жүрек талмасы диагнозын қойды. Полиция қызметкерлерінің шұғыл әрекетінің арқасында медициналық көмек уақтылы көрсетіліп, адам өмірі сақталып қалынды.
— Мұндай сәтте адамның жағдайы туралы ғана ойлайсың. Біз тек өз борышымызды орындадық, — деді полиция капитаны Ринат Қуаниязов.
Зардап шеккен азаматтың жұбайы тәртіп сақшыларына өз алғысын білдірді.