2 сәуірінде Өскемен қаласындағы аялдамалардың бірінде Volvo маркалы автобуста пневматикалық баллон жарылды. Соның сынықтарынан автобус күтіп тұрған 63 жастағы әйел жарақат алды.
Шығыс Қазақстан облысының Полиция департаментінің мәліметінше, зейнеткер медициналық мекемеге жеткізілді.
— Аталған факті бойынша сотқа дейінгі тергеу басталды. Бірқатар сараптама тағайындалды. Соның қорытындысы бойынша процессуалдық шешім қабылданады, — делінген ақпаратта.
ШҚО Денсаулық сақтау басқармасының хабарлауынша, қарт әйел мамандандырылған медициналық орталыққа жеткізіліп, қазір нейрохирургия бөлімінде жатқызылған. Жағдайы тұрақты, қанағаттанарлық. Қажетті ем қабылдауда.