Полиция қызметкерлері «Кордон» бекетінде Ресей Федерациясының азаматына көмек көрсетті. Ол Үндістаннан автостоппен келе жатқан.
— Полиция капитаны Азамат Ахмадиевке және полицияның аға лейтенанты Естай Мусинге 40 жастағы Ресей Федерациясының азаматы Игорь Жуков жүгінді. Ол шекараға дейін көлік табуға көмек сұрады. Тәртіп сақшылары саяхатшыға көмек көрсетіп, шекарадан өту тәртібін түсіндіріп, оның әрі қарайғы жолын қауіпсіз түрде ұйымдастыруға көмектесті, — деп хабарлады облыстық Полиция департаментінен.
Игорь Жуков тек полицейлерге емес, барша қазақ еліне өз ризашылығын білдірді.
— Автостоппен бірнеше мемлекетті аралап, енді міне Қазақстанға табан тіреп отырмын. Мұндағы халықтың қонақжайлығы керемет. Мейірім төгіп, әркез көмектесуге әзір тұрады. Сол үшін сіздерге шын жүректен алғыс айтамын!, — деді саяхатшы.