Шығыс Қазақстан облысы Күршім ауданында ірі қара мал арасында бруцеллез ауруының көбеюіне байланысты карантин енгізілгеніне бес ай болды.
Ауру анықталған Теректібұлақ ауылында мамандар 15-20 күн сайын малдан қан алып, зерттеулер жүргізіп жатыр. Десе де инфекцияның жаңа жағдайлары тіркелуде.
— Ірі қара мен ауруға бейім басқа да малдан қан алынып, Күршім ауылындағы зертханада талдау жұмыстары жүргізілуде. Әлі күнге дейін ауру анықталып жатқандықтан, сауықтыру шаралары жалғаса береді, — дейді ШҚО Ветеринария басқармасының бас маманы Анар Рахманова.
Өткен жылы облыста төрт түліктен қауіпті аурулардың 10 ошағы тіркелді. Оның ішінде құтыру – 6, бруцеллез – 3, эмфизематозды карбункул – 1. Тарбағатай ауданында Жетіарал ауылдық округіне қарасты Қамысты ауылында құтырма ауруын емдеу жұмыстары жалғасуда.