Бұқтырма су қоймасы арқылы өтетін Орталық Азиядағы ең ұзын көпір қолданысқа берілгеннен кейін Шығыс Қазақстан өз инвестициялық әлеуетін едәуір арттырды.
Жеті ауданды тоғыстырған көпір өңір тұрғындарына бизнесті дамытуға мүмкіндік беріп қана қоймай, жаңа туристік және логистикалық мүмкіндіктер ашты.
Туризм — аймақтағы басты салалардың бірі және оның дамуына үлкен көңіл бөлінеді. Бұл саланың болашағы зор. Себебі Шығыс Қазақстан – көгілдір көлі, аспанмен астасқан таулары, ит тұмсығы өтпейтін ну орманы мен ғажап пейзажы бар бірегей аймақ.
Әсіресе Марқакөл көлі маңында туризмді дамытутың әлеуеті жоғары. Алдағы уақытта Шығыс Қазақстанның інжу-маржанын жыл сайын миллиондаған қонақ келетін Қытайдағы Канас көлімен байланыстыратын халықаралық жобаны жүзеге асыру жоспарлануда.
Ортақ туристік маршрут бизнес үшін жаңа мүмкіндіктер ашады – жоғары деңгейдегі қонақ үйлер мен қонақжайлар салу, қызмет көрсету сапасын жақсарту және салаға инвестициялар тарту көзделіп отыр. Осыны жүзеге асыру үшін Мемлекет басшысының тапсырмасы бойынша, келесі жылы Катонқарағай және Зайсан аудандарында екі әуежайдың құрылысы басталады. Бұл әуежайлар ішкі және сыртқы туризмге оң әсерін тигізетіні сөзсіз.