Зайсан ауданында ауа температурасының күрт жылытуына байланысты қар ерте еріп жатыр. Су тасқынының алдын алу үшін қазір жолдарды, жол жиектеріндегі құбырларды тазалау, қарды күреу сынды жұмыстар қолға алынған.
Облыс әкімі Ермек Көшербаев, құзырлы басқармалар өкілдері, ШҚО төтенше жағдайлар және полиция департаменттері, Тарбағатай ауданы әкімі мен Зайсан ауданы әкімінің орынбасарының қатысуымен жедел кеңес өткізді. Мамандардың айтуынша, мұндай жылы ауа райы өңірде соңғы 50 жылда тіркелмеген.
— Әрбір елдімекен үшін су тасқыны қаупі картасын, оның ішінде әрбір ауылды және төтенше жағдай кезіндегі іс-қимылдардың егжей-тегжейлі алгоритмін жаңарту қажет. Аудан, ауыл әкімдері төтенше жағдай болған жағдайда бекітілген алгоритм бойынша әрекет етуі тиіс. Бәріне дайын болуларыңыз керек. Басқа аудандардың да тәжірибесін қолданыңыздар, — деді әкім.
Су тасқынына қарсы іс-шараларға жергілікті атқарушы органдар мен аудандық төтенше жағдайлар бөлімі жұмылдырылған.
— Зайсан үшін бұл қалыпты жағдай. Жер қатқан кезде, әсіресе Дайыр мен Қарабұлақ ауылдарының маңында жер асты суы жиі шығады. Су жиналған кезде құбырға, одан әрі Кеңдірлі көліне құяды. Бұл – жыл сайын қайталанатын табиғи құбылыс, алаңдаудың қажеті жоқ, — дейді гидротехник Мирзан Иманжанов.
Құтқару қызметі мен синоптиктердің мәліметінше, алдағы күндері өңірде күн суытады деп күтілуде. Сондықтан бұл аумақта су басу қаупі байқалмайды.