Бүгінде кәсіпорын қажетті барлық рұқсат қағаздарын алған. Экологиялық және басқа да кодекстерді бұзу фактілері анықталмады. Еске салсақ, бұған дейін алтын өндіретін зауыт салынуы бойынша бірнеше рет дөңгелек үстелдер мен қоғамдық тыңдаулар өткізілген. Онда аудан тұрғындары өздерін толғандырған сұрақтарын қойып, жағдайды жан-жақты талдау негізінде толық жауаптар алды. Зауыт су айдындарына еш әсер етпейді. Сонымен қатар ол елді мекендерден едәуір қашықта орналасқан. Алтынды осындай әдіспен әлемде мыңдаған кәсіпорын өндіреді. Бұл Қазақстандағы осындай алғашқы зауыт емес.
Зауыттың ашылуы ауданға мультипликативті экономикалық әсерін (салықтар, халық үшін жұмыс орындарын құру) тигізеді. Компания әлеуметтік міндеттемелерді де өз мойнына алған. Ол міндеттемелерін бірнеше жыл бойы орындап келеді. Олардың қатарында Маралды ауылына көмір сатып алу, жол жөндеу, түлектерді оқыту, көпбалалы және аз қамтылған отбасыларға көмек көрсету бар. Компания жоғары әлеуметтік жауапкершілікті көрсетіп отыр, себебі қазір Маралдыны депрессивті елді мекен деп санауға болады. Ал өндірістің ашылуы оның дамуына жаңа серпін беріп, басқа ауылдар мен қалаларға кетіп жатқан адамдар ағынын айтарлықтай азайтады, ауылға мамандарды тартады және Күршім ауданы экономикасының дамуына елеулі үлес қосады.
