16 күні қараша күні Өскемен қаласындағы Жібек маталар комбинаты ықшам ауданындағы бірнеше үй жылусыз қалды.
Нақты айтқанда, Драма театры, «Ертіс сити» тұрғын үй кешені аумақтарында диаметрі 630 мм жылу магистралінде ақау шығып, салдарынан жылу беру уақытша тоқтатылған. «Шығыс Жылу» АҚ мамандары ақау орнын анықтап, қалпына келтіру жұмыстарын бастады. Облыс және қала басшылығы ақау шыққан жерде мәселенің мәнісін зерттеуде. Оқиғаның себептерін анықтау үшін арнайы комиссия құрылды.
«Мамандар мен техника жұмыс істеп жатыр. Ақау шыққан орынды анықтауда қиындықтар болды. Жөндеу жұмыстары аяқталғаннан кейін жылу беріледі. Түсіністік танытқаны үшін тұрғындарға алғыс айтып, сабыр сақтауды сұраймыз. Жағдай жергілікті атқарушы органдардың бақылауында», — деді ШҚО әкімінің орынбасары Бақытжан Байахметов.
