Шығыс Қазақстан облысының әкімі Ермек Көшербаев «Самұрық-Энерго» АҚ басшылығымен кездесіп, электр энергетикасы саласындағы бірқатар жобаны жүзеге асыру мәселелерін талқыға салды.
Атап айтқанда, тараптар 2027 жылы пайдалануға беру жоспарланып отырған Өскемен СЭС-інің №4 гидроагрегатын жаңғырту мәселесін талқылады. Бүгінде жобалық-сметалық құжаттаманы әзірлеуге және гидрогенератор мен басқа да жабдықтарды жеткізуге келісім-шарттар жасалған. Бұл жоба су электр станциясының қуатын 12,2 МВт-қа арттырып, агрегат арқылы су шығынын азайтады.
Сонымен қатар Шүлбі су электр станциясының екінші кезегін салу мәселесі көтерілді. Бұл оның оның қуаттылығын 348 МВт-қа арттырмақ. Бұл жобаның техникалық-экономикалық негіздемесін әзірлеуді Гидропроект институты мен Қазақ су шаруашылығы ғылыми-зерттеу институты бірлесіп жүзеге асырады. Жобаның болжамды құны 450 млрд теңгені құрайды.
Жиын барысында Өскеменде жаңа жылу электр станциясын салу тақырыбы да айтылып, өңірді электр энергиясымен қамтуға қатысты басқа да мәселелер талқыланды.
