2026 жылдың басынан бері Шығыс Қазақстанға 195 мың турист келген. Оның 189 мыңы – Қазақстан тұрғындары, 6 мыңнан астамы – шетелдіктер. Бұл деректер жазғы туристік маусымның қорытындысына арналған Өңірлік коммуникациялар қызметінің брифингінде айтылды. Ал өткен жылы өңірге шамамен 450 мың адам келген.
2026 жылдың екінші тоқсанында облыста 22,3 мың төсек-орны бар 447 орналастыру нысаны жұмыс істеді. Олар көрсеткен қызмет көлемі 5,2 млрд теңгені құрады.
ШҚО-дағы демалыс бағыттары әртүрлі. Катонқарағай мен Ұлан ауданына табиғат аясында демалып, денсаулығын жақсарту үшін барады. Алтай қаласы, Глубокое ауданы мен Риддер белсенді демалыс пен тау шаңғысы спортына қызығатындарды тартады. Марқакөл мен Зайсан табиғи бағыттарымен танымал. Демалыс күндері қысқа сапарға шығатындарға Өскемен, Ұлан және Глубокое аудандары қолайлы.
Катонқарағай ауданында қонақтарды орналастыратын орындарды көбейтіп, жеке үйлерді туристерді қабылдауға бейімдеу және қызмет сапасын жақсарту жоспарланған. 2026 жылы Берел мен Коробиха ауылдары Қазақстанның үздік бес туристік ауылының қатарына енді.
Басқа демалыс аймақтарында да жұмыс жүріп жатыр. Жаңа Бұқтырма маңында жылу, су және кәріз желілерін жаңғыртуда. Қоғамдық жағажайда медициналық пункт, санитарлық тораптар мен киім ауыстыратын кабиналар жабдықталды. Ұлан ауданында Сібе көлдерінің жағалауы абаттандырылып, Шалқар көліне апаратын жол жөнделді. Өскемендегі «Самал» және «Котлованы» жағажайларында тазалық, қауіпсіздік пен абаттандыру жұмыстары жүргізіліп жатыр.
Аудандарды танытуға фестивальдер де көмектеседі. Биыл Катонқарағайда «Алтай – түркі әлемінің алтын бесігі» халықаралық фестивалі, Марқакөлде «Марқакөл – Шығыстың інжу-маржаны» фестивалі өтті. Самар ауданындағы «ОУПЕН ЭЙР Сарыбел» музыкалық фестиваліне көп көрермен жиналды.
Туризм саласында бес ірі инвестициялық жоба жүзеге асырылып жатыр: «Katon Park Resort», «ФОРЕСТ ХИЛС», «ОРНЕК АУЛЫ», «УЛАР ПАРК» және Медведский орманшылығы аумағындағы глэмпинг форматындағы демалыс орындары. Инвестициялардың жалпы көлемі – 124 млрд теңге.
Өскемен маңындағы Горная Ульбинка ауылының жанында 40 гектар жерге экопарк салу жоспарланған. Онда жаяу серуендеу бағыттары, балалар және спорт алаңдары, көрініс тамашалайтын орындар болады. Парк бір мезгілде 2 мыңнан астам адамды қабылдай алады.
Тағы бір міндет – шалғайдағы туристік аудандарға жетуді жеңілдету. Катонқарағай және Зайсан аудандарында әуежайлар салынып жатыр.
Қазір Катонқарағайға жыл сайын шамамен 100 мың адам келеді. Алдағы бес жылда бұл көрсеткішті 250 мыңға жеткізу жоспарланған. Зайсан ауданында туристер санын 23 мыңнан 136 мыңға дейін өсіру көзделіп отыр.
Өңірдің мақсаты – қонақтарды жылдың төрт мезгілінде де қабылдау. Ол үшін жол, қауіпсіздік, сапалы қызмет пен дайын мамандар қажет.