Самар ауылында тұрғындарды сапалы ауызсумен қамтамасыз етуге бағытталған жоба мәресіне жақындады. Қазіргі уақытта нысанда іске қосу-баптау жұмыстары жүргізілуде. Жақын арада жаңа сумен жабдықтау жүйесін толық қуатымен іске қосу жоспарланып отыр.
Бүгінде су құбырын іске қосуға дайындау жұмыстары қарқынды жүргізілуде. Жұмыстар тіпті түнгі уақытта да тоқтамайды. Мамандар қажетті жұмыстарды тәулік бойы атқарып жатыр.
Бұған дейін жобаны аяқтау мерзімі жұмыс барысында анықталған техникалық мәселелерге байланысты кейінге шегерілген болатын. Мамандар анықталған кемшіліктерді жойып, жүйе нысандарын өзара қосу бойынша қосымша жұмыстар жүргізді.
Жүйені толық іске қосу үшін тағы 3 шақырым су құбырын тарту қажет. Жаңа учаске Самар ауылындағы жаңа су алу нысанын таза су резервуарымен жалғайды. Бұл учаскенің құрылысын қыркүйек айының соңына дейін аяқтау жоспарланып отыр.
Жобаны аяқтауға «Eiwaz» ЖШС қолдау көрсетіп отыр. Самар ауданының әкімі Серік Жеңісов пен «Eiwaz» ЖШС директоры Эрнст Нұртазин ынтымақтастық туралы меморандумға қол қойды. Келісім аясында компания су құбыры желісінің жетіспейтін учаскесін өз қаражаты есебінен ақысыз салып береді.
– Біз әрдайым Самар ауданының тұрғындарына қолдау көрсетуге дайынбыз. Бизнестің әлеуметтік жауапкершілігі аясында бұл жұмыстарды өз қаражатымыз есебінен орындау туралы шешім қабылдадық, – деді Эрнст Нұртазин.
Жұмыстар толық аяқталғаннан кейін барлық нысан бір жүйеге біріктіріліп, су құбыры пайдалануға дайын болады. Осылайша, Самар ауылының тұрғындары жақын арада сапалы ауызсумен қамтамасыз етіледі.
«Eiwaz» ЖШС мен Самар ауданы арасындағы ынтымақтастық бұл жобамен шектелмейді. Компания алдағы уақытта да ауданмен бірлесіп жұмыс істеп, аумақты дамытуға және тұрғындарды қолдауға бағытталған перспективалы жобаларға қатысуды жоспарлап отыр.
