Жыл басынан бері өңірде велосипед ұрлығының 48 дерегі тіркелді. Оның ішіндегі 42 қылмыс ашылып, ұрланған мүлік иелеріне қайтарылды.
— Азаматтар велосипедтерін аулаларда, кіреберістерде, дүкендердің жанында және басқа да көпшілік орындарда қараусыз қалдырып жатады, ал бұл ұрылардың оңтайлы сәтті пайдалануына жол ашады. Осындай жағдайлардың бірі Өскемен қаласында болған. Жергілікті тұрғын бір ай бойы велосипедін үйдің ауласында қалдырып келді. Бір күні ол мүлкінің жоғалғанын байқап, полицияға жүгінген. Үлбі полиция бөлімінің қызметкерлері күдіктіні ұстады. Ұрланған велосипед табылып, иесіне қайтарылды, — деп хабарлады облыстық ПД.
Полиция велосипедтерді тіпті қысқа уақытқа да қараусыз қалдырмауға, сенімді ұрлыққа қарсы құрылғыларды пайдалануға және мүмкіндігінше оларды жабық үй-жайда сақтауға кеңес берді.
— Велосипедтерді кіреберіс алаңға, тамбурларға және эвакуация жолдарына қоюға болмайды. Өрт шыққан жағдайда олар тұрғындардың қауіпсіз шығуына және шұғыл қызметтердің жұмысына кедергі келтіруі мүмкін. Өрт қауіпсіздігі талаптарын бұзғаны үшін әкімшілік жауапкершілік қарастырылған, — делінген ақпаратта.