Бұл туралы бүгін Риддер қаласы тұрғындарымен есеп беру кездесуін өткізген Шығыс Қазақстан облысының әкімі Нұрымбет Сақтағанов мәлім етті.
«Риддердің ауыл шаруашылығы саласының әлеуеті зор. 7 айда ондағы ауыл шаруашылығының жалпы өнімінің көлемі 8,4%-ға ұлғайды. Қалада 104 шаруа қожалығы жұмыс істейді. Риддердің өзінің қайта өңдеу базасы құрылды. «Milkom» ЖШС жылына 7,2 мың тоннаға дейін сүт шығарады», — деді аймақ басшысы.
Оның айтуынша, қалада дайын өнім көбірек өндірілуі үшін жергілікті шикізат көлемін және жұмыс істеп тұрған қайта өңдеу кәсіпорындарының жүктемесін ұлғайту қажет.
«Халықты жайылымдармен қамтамасыз ету – бір бөлек мәселе. Жайылымдардың жалпы ауданы 14,1 мың га құрайды. Бұл ретте шаруашылықтағы мал үшін қосымша шамамен 3,5 мың га жер қажет. Пайдаланылмайтын ауыл шаруашылығы жерлерін айналымға белсенді тартып, жемшөп базасын нығайту және халықтың жайылымдарға қолжетімділігін қамтамасыз ету керек. Қосымша құн мен жұмыс орындары Риддерде қалуы үшін «жем-шөп базасы – мал шаруашылығы – қайта өңдеу – сатудың» бірыңғай тізбегі жұмыс істеуі тиіс», — деді Нұрымбет Сақтағанов.
Облыс әкімі Риддер қаласының әкіміне құзырлы басқармалармен бірлесіп, қаланың 2026-2030 жылдарға арналған жайылымдарды басқару және пайдалану жоспарын іске асыруды қамтамасыз ету және жайылым тапшылығын қысқарту жөнінде шаралар қабылдауды, ауыл шаруашылығы тауарын өндірушілермен бірлесе отырып, жергілікті шикізат көлемін, қайта өңдеу қуаттарының жүктемесін ұлғайту және өнімді өткізу арналарын кеңейту міндеттерін қойды.