Алтай ауданының прокуратурасы мемлекеттік мекемеде бюджет қаражатының ұрланғанын анықтады. Бухгалтер бір жыл бойы екі бюджеттік ерекшелік бойынша ақшаны өзінің банк шотына аударып отырған. Жалпы сома 10 млн теңгені құрады.
Заңбұзушылық Алтай ауданының сәулет, қала құрылысы және құрылыс бөлімінде бюджет қаражатының заңды әрі тиімді жұмсалуына жүргізілген тексеру кезінде анықталды.
Прокуратураның мәліметінше, бухгалтер мемлекеттік қаражатты өзіне заңсыз аудару үшін бір мезгілде екі бюджеттік ерекшелікті пайдаланған. Бұл тәсіл тексеру анықтағанға дейін бір жыл бойы жалғасқан.
Алтай ауданының прокуратурасы аталған факті бойынша ҚР Қылмыстық кодексінің 189-бабы 3-бөлігінің 1), 2) тармақтарына сәйкес сотқа дейінгі тергеп-тексеруді бастады.
Алтай аудандық соты бухгалтерді кінәлі деп танып, екі жылға бас бостандығынан айырды. Сонымен қатар сотталған адам жергілікті өзін-өзі басқару органдары мен квазимемлекеттік сектор субъектілерінде қызмет атқару құқығынан өмір бойына айырылды.
Алайда ҚР Қылмыстық кодексінің 74-бабының 1-бөлігі негізінде тағайындалған жазаны орындау кейінге қалдырылды. Бұған сотталған адамның жас баласының болуы себеп болды.
Ұрланған 10 млн теңге мемлекет кірісіне толық қайтарылды.