Оралда құрамында еті бар мұздатылған жартылай фабрикаттарды «сұр» сертификаттау дерегі анықталды. ЕАЭО талаптарына сәйкестік туралы декларация Алматыдағы зертхананың хаттамасы негізінде тіркелген. Алайда зертхана өнімге ешқандай сынақ жүргізбегені белгілі болды.
Заңбұзушылықты Батыс Қазақстан облысы бойынша Техникалық реттеу және метрология комитетінің департаменті санитариялық-эпидемиологиялық бақылау органдарымен бірлесіп анықтады. Тексеруге өнімді бақылау мақсатында сатып алу нәтижесінде алынған материалдар негіз болған.
Мұздатылған жартылай фабрикаттарға Беларусь Республикасының сертификаттау органында рәсімделген ЕАЭО талаптарына сәйкестік туралы декларация қоса берілген. Құжаттарда декларация Алматыдағы аккредиттелген зертхана берген сынақ хаттамасы негізінде қабылданғаны көрсетілген.
Департамент зертханаға ресми сауал жолдады. Жауап барынша нақты болды: «Алынған жауапқа сәйкес, зертхана бұл өнімге сынақ жүргізбеген, тиісті сынақ хаттамасын ресімдемеген және бермеген».
Басқаша айтқанда, декларация тізілімде болғанымен, нақты сынақ жүргізілмеген. Құжат өнімнің тексерілгенін де, оның Еуразиялық экономикалық одақтың техникалық регламенттеріндегі міндетті талаптарға сәйкестігін де растамайтын жалған дәлелдемелік материал негізінде тіркелген.
Тексеру қорытындысы бойынша декларацияның Қазақстан аумағындағы күші жойылды. Ақпарат уәкілетті органға және техникалық реттеу саласын бақылайтын мемлекеттік органдарға жолданды.
Өнім өндірушісі сәйкестікті растау және бағалау рәсімдерін өткізу қағидаларын бұзғаны үшін әкімшілік жауапкершілікке тартылды.
Сауда және интеграция министрлігі декларацияның тізілімде болуы сынақтың нақты жүргізілгеніне өздігінен кепілдік бермейтінін атап өтті. Сондықтан мамандар хаттамалардың түпнұсқалығын және дәлелдемелік материалдардың қайдан алынғанын тексереді.
Департамент сәйкестікті бағалау туралы жалған құжаттарды анықтау және қажетті сынақтар өткізілместен декларацияларды тіркеу тәжірибесіне тосқауыл қою бойынша ведомствоаралық жұмысты жалғастырады.