Омбыда Қазақстан мен Ресейдің өңіраралық ынтымақтастығының XXII форумы басталды. Іс-шараға Шығыс Қазақстан облысының әкімі Нұрымбет Сақтағанов қатысып жатыр.
Форумға Ресей өңірлерінен 300-ден астам қатысушы және Қазақстаннан 100-ден астам өкіл жиналды. Алғашқы күннің негізгі алаңы Омбы Конгресс-холлы болды. Мұнда іскерлік байланыстар биржасы жұмысын бастады.
Іс-шараға мемлекеттік органдардың, бизнестің, қоғамдық ұйымдар мен сарапшылар қауымдастығының өкілдері қатысып жатыр. Іскерлік келіссөздерге 200-ден астам адам тартылған. Қазақстан атынан машина жасау, кеме жасау, мұнай-газ және химия өнеркәсібі, құрылыс, логистика және цифрлық технологиялар саласында жұмыс істейтін кемінде 44 компания қатысуда.
Форумның негізгі тақырыптарының бірі – көлік инфрақұрылымын дамыту. Ресей Көлік министрлігінің стендінде екі ел арасындағы өзен, әуе және теміржол қатынасының көрсеткіштері ұсынылды.
Омбы кәсіпорындары логистика мен көлік инфрақұрылымын дамытуға бағытталған бірлескен жобаларға қатысу мүмкіндіктерін таныстырды. Бұл бағыт Шығыс Қазақстан облысы үшін ерекше маңызға ие. Өйткені өңір шекара маңында орналасқан және Ресейдің көлік дәліздерімен ықпалдасқан.
«Ресей – менің тарихым» саябағында екі елдің көлік инфрақұрылымын дамытуға арналған көрме ашылды. Ресей-Қазақстан іскерлік кеңесінің кеңейтілген отырысында 20-ға жуық спикер сөз сөйлейді деп жоспарланған.
Күннің екінші жартысында өнеркәсіптік кооперация, көлік дәліздерін дамыту, экологиялық ынтымақтастық және Ертістің болашағына арналған панельдік сессиялар басталады. Соңғы екі тақырып Шығыс Қазақстан облысы үшін айрықша маңызды. Ертіс өңірді Ресей аумақтарымен байланыстырып қана қоймай, экологиялық және көлік күн тәртібінің маңызды бөлігі болып қала береді.
Конгресс-холлда Ресей-Қазақстан жастар форумы да қатар өтіп жатыр. Оның қатысушылары кәсіпкерлікті дамыту мен әлеуметтік бастамаларды талқылауда.
Негізгі бағдарлама басталар алдында Омбы облысының губернаторы Виталий Хоценко Қазақстанның Ресейдегі Төтенше және Өкілетті Елшісі Дәурен Абаевпен кездесті. Тараптар Омбы үшінші рет қабылдап отырған форумның бағдарламасын талқылады.
25 шілдеде мемлекет басшыларының қатысуымен пленарлық отырыс өтеді. Оның қорытындысы бойынша екіжақты құжаттар мен коммерциялық келісімдерге қол қою жоспарланған.
Қатысушылар үшін мәдени бағдарлама да әзірленген. Қонақтар Омбының музейлері мен көрме алаңдарын аралай алады. Ал кешке «Әлемді айнала» саябағында IOWA тобының концерті өтеді.
Форум күндері қаланың қоғамдық көліктері Қазақстан мен Ресейдің туларымен безендірілген. Омбы көшелерінде ресми рәміздер бейнеленген 219 автобус қатынап жүр. Форумның логотипі мен екі елдің мемлекеттік тулары Омбы телемұнарасының медиафасадында көрсетіледі.