Красин көшесіндегі қараусыз қалған көпқабатты үйдің төбесінде жүрген жасөспірімдерді өтіп бара жатқан адамдар байқаған.
Жергілікті тұрғындар бұл жағдайға алаңдап отыр. Олардың айтуынша, қараусыз қалған ғимаратқа жасөспірімдер ғана емес, кішкентай балалар да жиі барады. Тұрғындар мұндай жағдайлар туралы полицияға хабарлайды, алайда тәртіп сақшылары келгенше балалар көбіне қашып кетеді.
ШҚО Полиция департаменті бүгінгі оқиғаға қатысты өтініш түспегенін хабарлады.
– Хабарламаны тексеру барысында көрсетілген мекенжайдан және оған іргелес аумақтан кәмелетке толмағандар табылған жоқ. Полиция қызметкерлері маңайды тексеріп, жарияланымда көрсетілген мән-жайларды анықтады, – деп түсіндірді ведомство өкілдері.
Полиция ата-аналар мен заңды өкілдерге балалардың қауіпсіздігіне тиісті көңіл бөлуге, олардың қайда жүргенін және кімдермен араласатынын біліп отыруға, сондай-ақ кәмелетке толмағандардың бос уақытын қалай және қайда өткізетінін бақылауға кеңес берді.