Қазақстанда ресми жұмыс істеп, әлеуметтік кепілдіктерге ие азаматтар көбейіп келеді. 2026 жылдың бірінші тоқсанының қорытындысы бойынша жалдамалы жұмыскерлер саны 150 мыңға жуық адамға артты.
Жұмыспен қамтылған халықтың жалпы саны 9 миллион 392 мың адамға жетті. Бұл өткен жылдың сәйкес кезеңімен салыстырғанда 108,5 мың адамға көп.
Негізгі өсім еңбек шарты бойынша жұмыс істейтін азаматтардың есебінен қамтамасыз етілді. Олардың саны 7 миллион 140,9 мыңнан 7 миллион 290,4 мың адамға дейін өсті.
Сонымен қатар елде жұмыспен қамтудың тұрақтылығы төмен түрлерімен айналысатын азаматтар азайып келеді. Бір жыл ішінде өзін-өзі жұмыспен қамтығандар саны 2 миллион 142,5 мыңнан 2 миллион 101,6 мың адамға дейін қысқарды.
Тәуелсіз жұмыскерлер саны 30 мыңнан астам адамға азайып, 357,2 мыңнан 326,6 мың адамға түсті. Еңбек және халықты әлеуметтік қорғау министрлігі бұл көрсеткіштер азаматтардың біртіндеп экономиканың ресми секторына ауысып жатқанын көрсетеді деп есептейді.
Жұмыссыздық деңгейі де тұрақты күйінде қалып отыр. Жұмыссыздар саны 446 мың адамға дейін азайды, ал жұмыссыздық деңгейі 4,5% болды. Жастар арасындағы жұмыссыздық деңгейі 3% құрады.
Ресми еңбек нарығын дамытуға Электрондық еңбек биржасы көмектеседі. Ол арқылы жұмыс берушілер мамандар іздей алады, ал азаматтар бос жұмыс орындарын қарап, кәсіби оқудан өтіп, жұмыспен қамтуға жәрдемдесудің мемлекеттік шараларын пайдалана алады.
Ағымдағы жылдың 1 шілдесіндегі жағдай бойынша мемлекет пен жұмыс берушілердің қолдауымен 249 595-тен астам адам жұмысқа орналастырылды. Оның ішінде 96 415 адам тұрақты жұмыс тапты.
Еңбек және халықты әлеуметтік қорғау министрлігі алдағы жұмыстың негізгі бағыттары жұмыспен қамту сапасын арттыруға, заманауи жұмыс орындарын ашуға, адами капиталды дамытуға және ресми жұмысқа орналасу мүмкіндіктерін кеңейтуге бағытталатынын мәлімдеді.