Шығыс Қазақстан облысында Ұлан ауданында заңсыз алтын өндірген топ мүшелеріне үкім шығарылды. «Алтын безгегі» оларға 15 килограмм бағалы металл, мемлекетке келтірілген 766 миллион теңге залал және әртүрлі мерзімге бас бостандығынан айыру жазасын әкелді.
Қылмыстық әрекетті Шығыс Қазақстан облысының прокуратурасы ҰҚКД, ПД және ЭТД-мен бірлесіп тоқтатты. 2025 жылғы маусымда жүргізілген бірлескен операция кезінде құқық қорғау органдары Үлкен және Кіші Шыбынды өзендерінің аңғарында заңсыз жұмыс істеген шетел азаматтарын ұстады. Оқиға орнынан арнайы техника, жабдықтар, құрамында алтыны бар шикізат пен ақша тәркіленді.
Тергеу барысында облыс тұрғындары мен Қытай Халық Республикасының азаматтары 2024-2025 жылдары өз бетінше заңсыз алтын өндіруді ұйымдастырғаны анықталды. Сонымен қатар топ Ұлан ауданындағы орман қорына залал келтірген.
Прокуратура қылмыстық істі сотқа жолдады. Мемлекеттік айыптаушы жер қойнауын заңсыз пайдалану фактісін дәлелдейтін айғақтарды ұсынып, сотталушыларға қылмыстың ауырлығы мен экологиялық залалдың ауқымына сай жаза тағайындауды сұрады.
2026 жылғы 21 шілдеде Өскемен қаласының қылмыстық істер жөніндегі мамандандырылған ауданаралық соты сотталушыларды аса ірі көлемде бағалы металдарды заңсыз өндіргені үшін кінәлі деп таныды. Сот оларға әртүрлі мерзімге бас бостандығынан айыру жазасын тағайындады. Үкім әзірге заңды күшіне енген жоқ.