Қазақстан мен Жапония парниктік газдар шығарындыларын азайту және оларды сіңіру бағытындағы бірлескен жобаларды дамытуды жоспарлап отыр. Ынтымақтастықтың келешегін Қазақстан Республикасы экология және табиғи ресурстар вице-министрі Мансур Ошурбаев пен жапониялық Marubeni Corporation компаниясының өкілдері талқылады.
Тараптар Париж келісімінің 6-бабы аясындағы жобаларды, сондай-ақ JCM деп аталатын Бірлескен кредиттеу тетігін одан әрі қолдану мәселесін қарастырды. Бұл тетік елдерге парниктік газдар шығарындыларын азайтатын технологиялар мен жобаларды бірлесіп енгізуге мүмкіндік береді.
Мұндай жобаларды іске асыруға жаңа заң құқықтық негіз қалады. 2026 жылғы 8 шілдеде Мемлекет басшысы «Қазақстан Республикасының кейбір заңнамалық актілеріне экология мәселелері және экономиканың жекелеген салаларын жетілдіру бойынша өзгерістер мен толықтырулар енгізу туралы» Қазақстан Республикасының Заңына қол қойды.
Құжат Париж келісімінің 6.2 және 6.4-баптарында бекітілген халықаралық көміртегі тетіктері аясында парниктік газдар шығарындыларын азайту және оларды сіңіру жобаларын іске асыруды көздейді.
Экология және табиғи ресурстар министрлігі жапон тарапымен Бірлескен кредиттеу тетігін дамыту және ортақ жобаларды іске қосу жөніндегі жұмысты жалғастырады.