Несие жүктемесінің жоғары болуы Шығыс Қазақстандағы 21 мен 35 жас аралығындағы жастардың ресми жұмысқа орналасқысы келмеуінің бір себебіне айналды.
ШҚО Жұмыспен қамтуды үйлестіру және әлеуметтік бағдарламалар басқармасының мәліметінше, жастардың едәуір бөлігінің мерзімі өткен берешегі бар. Оларға қатысты атқарушылық іс жүргізу қозғалып, банк шоттары бұғатталған.
Ресми жұмысқа орналасқан жағдайда жұмыс беруші атқарушылық құжаттар негізінде жалақының бір бөлігін ұстап қалуға міндетті. Соның салдарынан қызметкердің қолына тиетін табыс азаяды.
Сондықтан көптеген жас бейресми жұмыс істеуді таңдайды. Бұл оларға атқару парақтары бойынша қаражат ұсталмай, табысын толық алуға мүмкіндік береді. NEET санатындағы жастардың әлеуметтік портреттерінде 664 адамның бейресми жұмыс істейтіні көрсетілген. Сауалнама жүргізілген кезде дәл осынша адам ресми жұмыс істеуге ниет білдірмеген.
Осылайша тұйық шеңбер қалыптасады. Қарыз адамды ресми жалақыдан бас тартуға итермелейді, ал жұмыспен қамту жүйесі оны ресми жұмысқа орналасқысы келмейтін азамат ретінде тіркейді.
Басқарма әлеуметтік портреттер жұмыспен қамтуға жәрдемдесудің және кәсіпкерлік белсенділікті қолдаудың атаулы шараларын әзірлеуге көмектеседі деп есептейді.