Қазақстан Республикасы Мәдениет және ақпарат министрлігі мен Ішкі істер министрлігінің өкілдері әйелдердің қатысу аясын кеңейту және трансшекаралық ынтымақтастыққа гендерлік аспектілерді енгізу мәселелеріне арналған өңірлік семинарға қатысып жатыр.
Кездесу Бішкекте өтуде. Бір үстел басына Орталық Азия елдеріндегі гендерлік саясат пен халықаралық ынтымақтастыққа жауапты мемлекеттік органдардың өкілдері жиналды. Семинар Орталық Азиядағы шекараны басқаруға жәрдемдесу бағдарламасы аясында ұйымдастырылды. Қатысушылар әйелдердің шешім қабылдау үдерісіне қатысуын кеңейту және «Әйелдер, бейбітшілік және қауіпсіздік» күн тәртібін ілгерілету жолдарын талқылап жатыр.
Семинарда трансшекаралық ынтымақтастыққа гендерлік аспектілерді енгізуге, өңірлік диалогті нығайтуға және мамандар даярлауға ерекше назар аударылды. Сондай-ақ гендерлік теңдікті тек құжат жүзінде емес, іс жүзінде де қамтамасыз етуге бағытталған тетіктерді жетілдіру мәселесі көтерілді.
Қазақстанның семинарға қатысуы Орталық Азияның басқа мемлекеттерімен тәжірибе алмасуға, тең мүмкіндіктер мен орнықты даму саласындағы өңірлік ынтымақтастықты нығайтуға мүмкіндік береді.