Алты айдың қорытындысы бойынша мемлекеттік бюджетке 284 млрд теңге салықтық түсім түсіп, жоспар 102,4%-ға орындалды. Бұл жоспардан 6,6 млрд теңгеге артық. Өткен жылдың сәйкес кезеңімен салыстырғанда бюджет кірісі 78 млрд теңгеге немесе 37,8%-ға өсті. ШҚО бойынша Мемлекеттік кірістер департаменті 2026 жылдың І жартыжылдығындағы жұмыс қорытындыларын жариялады.
Бюджеттің негізгі кірісі қосылған құн салығы, пайдалы қазбаларды өндіруге салынатын салық, корпоративтік табыс салығы, жеке табыс салығы және әлеуметтік салық есебінен қалыптасты. Ал ең жоғары түсім өңдеу өнеркәсібі, тау-кен өндірісі, сауда және құрылыс салаларынан түсті. Сонымен қатар салықтық және кедендік әкімшілендіру нәтижесінде республикалық бюджетке қосымша 6,3 млрд теңге өндірілді.
Мемлекеттік қызметтерді цифрландыру жұмыстары да жалғасуда. Жыл басынан бері облыста 264 822 мемлекеттік қызмет көрсетілсе, оның 99,7%-ы электрондық форматта ұсынылды. Қағаз түрінде көрсетілген қызметтер саны өткен жылмен салыстырғанда 62%-ға азайды.
Биыл толық іске қосылған Салықтық әкімшілендірудің интеграцияланған ақпараттық жүйесі мен жаңа Салық кодексі құжаттарды өңдеу мерзімін қысқартып, салықтық рәсімдерді жеңілдетуге мүмкіндік берді. Сонымен қатар салық есептілігінің көлемі 30%-ға қысқарып, есептілік нысандарының саны 39-дан 28-ге дейін азайтылды.
Департаменттің мәліметінше, алдағы уақытта да мемлекеттік қызметтердің сапасын арттыру және цифрлық сервистерді дамыту жұмыстары жалғасады.