Қаржылық мониторинг агенттігінің Павлодар облысы бойынша департаменті сирек кездесетін жыртқыш құстарды заңсыз сатып алып, ұстады деген күдікке ілінген жергілікті тұрғынға қатысты тергеуді аяқтады. Тінту кезінде күштік құрылым қызметкерлері Қазақстанның Қызыл кітабына енген 35 құсты анықтады.
Тергеу мәліметінше, күдікті Қарағандыдағы жеке үйінің аумағында заңсыз құс тәлімбағын ұйымдастырған. Ол құстарды 2017 жылдан бері ұстаған. Ер адам «Құсбегілік» федерациясының мүшесі әрі жыртқыш құстармен аң аулау бойынша Қазақстан құрамасының сапында болған. Алайда тергеушілердің пікірінше, оның дәстүрлі өнерге деген қызығушылығы белгіленген ережелер мен заң аясынан шығып кеткен.
Күдікті Instagram желісінде тақырыптық парақша жүргізіп, ұлттық аңшылық, жыртқыш құстарды ұстау және емдеу туралы материалдар жариялаған. Әлеуметтік желі арқылы табиғи мекенінен ұсталған сирек кездесетін жыртқыш құстарды жеткізіп отырған адамдармен байланыс орнатқан.
Тұрғылықты жерін тінту барысында қызметкерлер 35 құсты тауып, тәркіледі. Олардың арасында ителгі, бүркіт және лашын бар. Бұл құстардың барлығы Қазақстан Республикасының Қызыл кітабына енгізілген және сирек кездесетін әрі жойылып кету қаупі төнген жануарлар санатына жатады.
Күдікті қамауға алынды. Сондай-ақ сот санкциясымен тергеу оның Toyota 4Runner автокөлігіне тыйым салды.
Қазір тәркіленген құстар Қарағанды хайуанаттар бағында уақытша ұсталуда. Сот үкімі заңды күшіне енгеннен кейін оларды табиғи мекеніне жіберу жоспарланып отыр.
ҚР Қылмыстық-процестік кодексінің 201-бабына сәйкес, іс бойынша өзге ақпарат жария етілмейді.