Шығыс Қазақстан облысының әкімі Нұрымбет Сақтағанов алдағы қысқа дайындықты қазірден бастап толыққанды жүргізуді тапсырды. Оның айтуынша, биылғы қыс ұзақ әрі аязды болуы мүмкін. Сондықтан коммуналдық нысандарды жөндеуді алғашқы суық түскенге дейін созуға болмайды.
Өңір басшысы синоптиктердің мәліметінше, биылғы аптап жаз 1941 жылғы жазды еске салғанын атап өтті. Бұл ретте орташа жылдық температура көпжылдық орташа көрсеткіштерге жуықтауы тиіс. Демек, аптап ыстықтан кейін өңірде ұзаққа созылатын аяз болуы мүмкін.
– Биылғы жаз өте ыстық болды. Ал алдағы қыс ұзақ әрі аязды болады. Сондықтан қысқа қазірден бастап жақсылап дайындалуымыз қажет. Бұл көршілеріміздегі бірқатар мұнай өңдеу зауытының ішінара істен шығуына байланысты тіпті маңызды болып отыр. Облыстағы барлық жылу электр орталығы мен қазандықтарды жөндеу жұмыстарын жеке бақылауға алыңыздар. Риддер қаласы ерекше назарда болуы тиіс. Небәрі екі ай қалды, қазан айында бізде қар жаууы мүмкін. Әкімдер жанар-жағармайға қатысты мәселе туындауы ықтимал болғандықтан, егін жинау науқанына ерекше назар аударыңыздар. Дайындықты қазірден бастау керек, – деді Нұрымбет Сақтағанов.
Өңір басшысы облыстағы барлық жылу электр орталығы мен қазандықтарды жөндеу жұмыстарын жеке бақылауға алуды талап етті. Жылумен қамту жүйесінің жағдайы әлі де өзекті мәселелердің бірі болып отырған Риддер қаласына ерекше көңіл бөлінуі тиіс.
Қысқа тек коммуналдық қызметтер ғана дайындалмайды. Нұрымбет Сақтағанов жанар-жағармайға қатысты ықтимал мәселелерге байланысты егін жинау науқанына да баса назар аударуды тапсырды.