Қазақстан құрамасы Вильнюсте өткен 37-ші Халықаралық биология олимпиадасында (International Biology Olympiad) үш күміс және бір қола медаль жеңіп алды.
Байқау 12–19 шілде аралығында өтті. Оған 84 елден 330-дан астам дарынды жас биолог қатысты. Қазақстандық оқушылар күрделі теориялық тапсырмалар мен зертханалық практикумдарды сәтті орындады.
Олимпиада қорытындысы бойынша Павлодар облысындағы дарынды ер балаларға арналған «Білім-инновация» лицей-интернатының 11-сынып оқушысы Қайыркен Ерсұлтан, Алматы қаласындағы мамандандырылған «Білім-инновация» лицей-интернатының 9-сынып оқушысы Аширханов Алихан және Алматы-Медеу NIS мектебінің 11-сынып оқушысы Желтова Софья күміс медаль иеленді.
Қола медальді Қарағанды қаласындағы NIS мектебінің 11-сынып оқушысы Меженина Евгения жеңіп алды.
Бұл нәтиже Қазақстан құрамасына 1996 жылы тіркелген Халықаралық биология олимпиадасындағы үздік жетістігін қайталауға мүмкіндік берді. Сөйтіп, рекордтың қайталануын тура 30 жыл күтуге тура келді. Биологияның ұзақ үдерістерді ұнататыны белгілі.
Оқушыларды халықаралық жарысқа Nazarbayev University өкілі Лейла Аскарова, «Білім-инновация» халықаралық қоғамдық қорының әдіскері Ильяс Сакимов, Nazarbayev University зертханасының үйлестірушісі Садыкова Камиля және Астана медицина университетінің студенті Динмухаммед Уразбаев дайындады.
Халықаралық биология олимпиадасы 1990 жылдан бері өткізіліп келеді. Қазақстан оған 1994 жылдан бастап қатысады. 2025 жылы ұлттық құрама төрт қола медаль жеңіп алса, 2026 жылы нәтижесін үш күміс және бір қола жүлдеге дейін жақсартты.
Осылайша, қазақстандық оқушылар әлемдік додада дайындық деңгейінің жоғары екенін тағы бір мәрте дәлелдеді.