Қазақстандық оқушылар Қытай Халық Республикасының Сучжоу қаласында 12–20 шілде аралығында өткен IEO 2026 экономика жөніндегі халықаралық олимпиадасында бес медаль жеңіп алды.
Зияткерлік сайысқа әлемнің 61 елінен 300-ге жуық оқушы қатысты. Қазақстан құрамасы бір алтын, үш күміс және бір қола медаль иеленді.
Алтын медальді Астана қаласы Нұра ауданындағы NIS-тің 11-сынып оқушысы Мұхтархан Батырхан жеңіп алды. Ол экономика жөніндегі халықаралық олимпиаданың екі дүркін алтын медаль иегері атанды.
Алматы қаласы Медеу ауданындағы NIS-тің 11-сынып оқушылары Дінмұхаммед Кемелов пен Альтаир Жапаров, сондай-ақ Алматыдағы «Мирас» халықаралық мектебінің 11-сынып оқушысы Аружан Сұлтанбек күміс медаль иеленді.
Қола медальді Алматы қаласы Медеу ауданындағы NIS-тің 10-сынып оқушысы Темірлан Қуанышбек жеңіп алды.
Ұлттық құраманы «Teenvestor» мектебінің директоры әрі құрама жаттықтырушысы Руслан Мулдашев пен «Дарын» республикалық ғылыми-практикалық орталығының әдіскері Зере Жарлағапова дайындады.
Экономика жөніндегі халықаралық олимпиада экономика, қаржы және бизнес салаларын зерттейтін оқушыларды біріктіреді. Қатысушылар теориялық білімдерін ғана емес, аналитикалық ойлау қабілетін және нақты жағдайларда шешім қабылдау шеберлігін де көрсетеді.
Қазақстан құрамасының 61 елдің өкілдері арасындағы нәтижесі оқушылардың жоғары дайындық деңгейін тағы бір мәрте дәлелдеді.