Қазақстанда республикалық маңызы бар автомобиль жолдарын жөндеу жұмыстары жалғасып жатыр. 2026 жылы Кешенді нысаналы бағдарлама аясындағы негізгі жұмыстардың басым бөлігі жоспардан озық орындалуда.
Бағдарлама еліміздің барлық өңірін қамтиды. Мемлекеттік тапсырма аясында 15 негізгі бағытта, сондай-ақ ақылы автомобиль жолдарының учаскелерінде жұмыстар жүргізіліп жатыр.
Жол жөндеушілер көлік доңғалағынан пайда болған іздер мен жол бетіндегі тарақ тәрізді кедір-бұдырларды жою жоспарын едәуір артық орындады. Жұмыс көлемі жоспарланған көрсеткіштен бес еседен астамға көбейді. Бүгінде мамандар жол жабынының шамамен 54 мың шаршы метр деформацияланған бөлігін қалпына келтірді.
Шұңқырларды жөндеу жұмыстары да жалғасуда. Дәстүрлі әдіспен шамамен 217 мың шаршы метр жол жабыны жөнделді. Бұл жоспардың 123%-ын құрайды. Ал бүрку әдісімен 11,7 мың шаршы метр жол қалпына келтіріліп, жоспар 109%-ға орындалды.
Автомобиль жолдарын жабдықтау жұмыстары да кестеден озық жүргізілуде. Жоспардағы 9,6 мыңның орнына жолдарға 11,3 мыңнан астам белгі беру бағаны орнатылды. Жоспар 118%-ға орындалды.
Сонымен қатар жол жөндеушілер шамамен 10 222 қума метр тосқауыл қоршауын орнатып, қалпына келтірді. Бұл бағыттағы жоспар 122%-ға орындалды.
Көктемгі-жазғы жол таңбалары 24,5 мың шақырым автомобиль жолына салынды. Бұл жоспардың 108%-ын құрайды. Бұдан бөлек, мамандар 5235 жол белгісін орнатып, ауыстырды. Жоспарланған жұмыс көлемі 105%-ға орындалды.
Ақылы автомобиль жолдарында да жұмыстар жалғасуда. Бұл учаскелерде 2993 жол белгісі орнатылып, ауыстырылды. Жоспар 104%-ға орындалды.
Автопавильондар мен демалыс алаңдарын жөндеу жоспары айтарлықтай артық орындалды. Жоспарланған 48 нысанның орнына 128 нысанда жұмыс жүргізілді.
Сондай-ақ ақылы жол учаскелерінде жоспардағы 451-дің орнына 493 километрлік көрсеткіш орнатылды. Жол таңбалары жоспарланған 16,9 мың шақырымның орнына 17,9 мың шақырымға салынды.