Шығыс Қазақстан облысы Полиция департаментінде Қазақстан Республикасы Қаржы нарығын реттеу және дамыту агенттігінің, екінші деңгейлі банктер мен қаржы ұйымдарының қауіпсіздік қызметі өкілдерінің қатысуымен интернет-алаяқтыққа қарсы іс-қимыл мәселелері бойынша жұмыс кездесуі өтті.
ШҚО Полиция департаменті бастығының бірінші орынбасары, полиция полковнигі Болат Нұрсейітов интернет-алаяқтықтың азаматтар үшін ең өзекті және қауіпті мәселелердің бірі болып қала беретінін атап өтті. Полиция тарапынан атқарылып жатқан алдын алу жұмыстарына қарамастан, қылмыскерлер заманауи технологиялар мен әлеуметтік инженерия әдістерін қолдана отырып, алдау схемаларын үнемі жетілдіріп отыр.
Кездесу барысында қатысушылар алаяқтықтың ең көп таралған схемалары мен клиенттерді қорғау шараларын талқылады, сондай-ақ қарт адамдардың қауіпсіздігіне ерекше назар аударылды.
Банктерге несие рәсімдеу, ірі көлемде қолма-қол ақша алу және күдікті операцияларды жүргізу кезінде бақылауды күшейту, сондай-ақ клиенттің алаяқтардың ықпалында жүргенін дер кезінде анықтау үшін қызметкерлердің біліктілігін арттыру ұсынылды.
Кездесу қорытындысы бойынша тараптар жедел ақпарат алмасуды күшейтуге, бірлескен алдын алу жұмыстарын жалғастыруға және күдікті қаржылық операциялар кезінде автоматтандырылған дауыстық ескертулерді енгізу мүмкіндігін қарастыруға келісті.
