ШҚО-да туризмді дамытуға серпін беретін жол жобалары іске асырылып жатыр. Биыл Үлкен Нарын, Бұқтырма су қоймасының жағалауы, Сібе көлдері мен Марқакөлге апаратын автомобиль жолдары ретке келтіріліп жатыр. Жалпы қамтылып отырған учаскелердің ұзындығы 215 шақырымды құрайды. Бұл туралы Өңірлік коммуникациялар қызметі алаңында өткен брифингте ШҚО жолаушылар көлігі және автомобиль жолдары басқармасының басшысы Әсет Сұлтанов мәлімдеді.
Өңірде жолдардың сапасына бақылау күшейтілді. Бұл жұмыстар “KazRoadLab” цифрлық платформасы арқылы жүзеге асрылады. Құрылыс жұмыстарына қолданылатын материалдар мен зертханалық сынақтардың ашықтығы қамтамасыз етілген. Бұдан бөлек, облыстық маңызы бар жолдардың цифрлық паспорты толық әзірленді. Биыл бұл жұмыс жергілікті жолдарда да жүргізіледі.
Жол қозғалысының қауіпсіздігін арттыру мақсатында Өскемен, Алтай және Риддерде 7 мыңнан астам бейнебақылау камерасы мен 243 «Мерген» аппараттық кешені жұмыс істеп тұр. Алдағы уақытта республикалық және облыстық маңызы бар автомобиль жолдарына фото және бейнетіркеу камераларын орнату мәселесі де қарастырылуда.