Қостанайда өрт сөндіру-құтқару спортынан Қазақстан Республикасы ТЖМ кубогы үшін өтіп жатқан IX турнирдің екінші жарыс күні аяқталды. Ерлер мен әйелдер «Кедергілері бар 100 метрлік жолақтан өту» сайысында мықтыларды анықтады.
Шығыс Қазақстан облысының құрамалары екі бірдей командалық есепте екінші орын алды. ШҚО әйелдер құрамасы қашықтықты 111,15 секундта еңсерді. Бірінші орынды 106,27 секунд нәтижемен Қостанай облысы иеленсе, 111,73 секунд көрсеткен Астана қаласы үшінші орынға тұрақтады.
Шығыс Қазақстан облысының ерлер командасы да күміс жүлде жеңіп алды. Команданың нәтижесі – 101,97 секунд. Астана қаласының құрамасы 99,81 секунд көрсеткішпен жеңіске жетті. Солтүстік Қазақстан облысы 103,65 секунд нәтижемен үшінші орын алды.
Әйелдер арасындағы жеке есепте Маңғыстау облысының өкілі Ситора Реджеметова 16,68 секунд нәтижемен жеңіске жетті. Қостанай облысынан Айдана Байтикова 17,08 секунд көрсетіп, екінші орын алды. Астана қаласының өкілі Кристина Подгородецкая 17,20 секунд нәтижемен үздік үштікті түйіндеді.
Ерлер арасында Солтүстік Қазақстан облысынан Ансар Шамшуллаев үздік нәтиже көрсетті – 16,38 секунд. Астана қаласының өкілі Райымбек Сарсекеев 16,47 секунд нәтижемен күміс жүлдеге ие болды. Қостанай облысынан Бекзат Мирамов 16,76 секунд көрсетіп, үшінші орын алды.
Турнир жалғасып жатыр. Жарыстың қорытынды күнінде қатысушылар «4×100 метрлік өрт эстафетасы» сайысында бақ сынайды. Осы сыннан кейін төрешілер IX турнирдің жалпыкомандалық есептегі жеңімпаздары мен жүлдегерлерін анықтайды.