2025 жылы Қазақстанда артериялық гипертония мен жүректің ишемиялық ауруын ерте анықтауға арналған скрининг аясында 1,7 миллион адам тексерілді.
Нәтижесінде дәрігерлер 114 мыңнан астам пациенттен қан айналымы жүйесінің ауруларын ерте сатысында анықтады. 99 мың адамға артериялық гипертония диагнозы қойылды. Бұл анықталған жағдайлардың жалпы санының 87%-ы. Тағы 15 мың пациенттен жүректің ишемиялық ауруы анықталды – 13%.
2025 жылдан бастап Денсаулық сақтау министрлігі скрининг бағдарламасына заманауи жоғары сезімтал диагностикалық әдістерді енгізді. Олар дәрігерлерге ауруларды ертерек анықтап, емдеуді жылдам бастауға мүмкіндік береді.
Қазір жүрек-қан тамырлары аурулары бар шамамен 1,9 миллион пациент динамикалық бақылауда тұр. Дәрігерлер олардың денсаулық жағдайы мен қауіп факторларын тұрақты бақылап, қажетті дәрі-дәрмекпен қамтамасыз етеді. Мұндай тәсіл ауыр зардаптардың қаупін азайтады.
Дүниежүзілік денсаулық сақтау ұйымының мәліметінше, қан айналымы жүйесінің аурулары әлемдегі өлім-жітімнің негізгі себебі болып қала береді. Жыл сайын бұл аурулар шамамен 19,8 млн адамның өмірін қияды – бұл барлық өлім жағдайының шамамен 32%-ы.