Қазақстанда тарихи-мәдени мұраны сақтауға бағытталған волонтерлік қозғалыс дамып келеді. Президенттің тапсырмасымен елде Madenietti Mura жобасы жүзеге асырылып жатыр. Жоба барлық өңірді қамтып, тұрғындарды тарих және мәдениет ескерткіштерін зерттеуге әрі қорғауға тартады.
Жоба аясындағы ең ауқымды шара «Мәдени мұраны бірге сақтайық» республикалық акциясы болды. Ол Қасым-Жомарт Тоқаевтың бастамасымен жарияланған Халықаралық волонтерлер жылына орайластырылды.
Тарихи ескерткіштердің аумағын тазалау және абаттандыру жұмыстарына Қазақстанның барлық өңірінен 900-ден астам волонтер қатысты. Елдің 20 өңірінде «Madenietti Mura волонтерлері» клубтары жұмысын бастады. Олардың мүшелері тарихи-мәдени мұраны тұрақты түрде сақтаумен айналысып, азаматтық белсенділікті дамытуға үлес қосады.
Ұйымдастырушылар еріктілерді даярлауға да ерекше көңіл бөлді. Өңірлерде өткен оқыту тренингтеріне 1000-ға жуық адам қатысты. Тағы 500 қатысушы «Мәдениет және тарих саласындағы волонтерлік қызмет негіздері» курсынан өтті.
Тарихшылар, өлкетанушылар мен музей қызметкерлері қатысушыларға арналған ашық кездесулер, дәрістер және шеберлік сабақтарын өткізді. Жас мамандар музейлерде тағылымдамадан өтіп, мәдени мұраны сақтау және дәріптеу саласында тәжірибе жинады.
Жоба аясында Madenietmura.kz цифрлық платформасы да дамып келеді. Ол волонтерлерді, тарихшыларды, мәдениет саласының өкілдерін, қоғамдық ұйымдар мен мемлекеттік органдарды бір алаңға біріктірді.
Қатысушылар платформа арқылы бастамаларды үйлестіреді, ақпарат алмасады және жаңа еріктілерді тартады.
Madenietti Mura жобасы волонтерлік мәдениетті дамытуға, жастардың ел тарихына деген қызығушылығын арттыруға және қоғамды Қазақстанның мәдени мұрасын сақтауға жұмылдыруға мүмкіндік береді.