Қазақстанда 2026–2027 оқу жылына колледждерге құжат қабылдау жалғасып жатыр. Қазірдің өзінде 55 мыңға жуық талапкер өтініш берген.
Биыл өңір әкімдіктері мемлекеттік білім беру тапсырысы аясында 140 мың грант бөлді. Орындардың басым бөлігі еңбек нарығында ерекше сұранысқа ие техникалық мамандықтарға бағытталды.
Колледждерде жаңа бағыттар бойынша мамандар даярлау да қолға алынды. Олардың қатарында «Жасанды интеллект технигі», «Мехатроника», «Жаңартылатын энергетика», «Графикалық анимация технигі» және «Экологиялық туризм менеджері» мамандықтары бар.
Құжаттарды eGov.kz порталы арқылы немесе таңдаған колледжге тікелей тапсыруға болады. Әр талапкер 4 мамандық пен 4 колледжге дейін таңдай алады.
Азаматтардың бірқатар санаты үшін квота қарастырылған. Ауыл жастарына орындардың 35%-ы, мүгедектігі бар адамдарға 10%-ы, көпбалалы отбасылардан шыққан балаларға 5%-ы, жетім балалар мен ата-анасының қамқорлығынсыз қалған балаларға 1%-ы бөлінген. Заңнамада азаматтардың тағы 6 санатына квота қарастырылған. Тиісті санатты eGov.kz порталында өтініш берген кезде көрсетуге болады.
Құжат қабылдау мерзімі таңдаған мамандыққа байланысты. Жұмысшы біліктіліктеріне құжаттар 27 тамызға дейін қабылданады. Талапкерлер оқуға түсу емтихандарын тапсырмайды, олар әңгімелесу қорытындысы бойынша қабылданады.
Орта буын мамандықтарына құжаттарды 20 тамызға дейін тапсыруға болады. Конкурс 23–24 тамызда аттестаттың орташа балы негізінде өтеді.
Педагогикалық және медициналық мамандықтарға құжат қабылдау 10 тамызға дейін жалғасады. Конкурс 16–17 тамызда өтеді. Педагогикалық мамандықтарға түсушілер әңгімелесуден өтіп, эссе немесе диктант жазады. Медициналық мамандықтар үшін арнайы емтихандар, ал шығармашылық мамандықтар үшін шығармашылық емтихандар қарастырылған.
Іріктеу Ұлттық білім беру деректер базасының ақпараттық жүйесі арқылы автоматтандырылған тәртіппен жүргізіледі. Мұндай тәсіл конкурстың ашықтығын қамтамасыз етіп, адам факторының ықпалын азайтуға тиіс.
Ақылы бөлімге құжаттар 27 тамызға дейін, кешкі және сырттай оқу нысандарына 20 қыркүйекке дейін қабылданады.
Осылайша, 9 және 11-сынып түлектері еңбек нарығында сұранысқа ие мамандықты тегін меңгере алады.
