Шығыс Қазақстанда дұрыс тамақтану өнімдерін жеткізу қызметіне қатысты іс сотта қаралып жатыр. Бұл туралы Өңірлік коммуникациялар қызметі алаңында өткен брифингте ШҚО бойынша Сауда және тұтынушылардың құқықтарын қорғау департаментінің басшысы Асхат Сағидолдин мәлімдеді.
Өскемен мен Риддер қалаларында қызмет көрсеткен жеке кәсіпкер тұрғындардан тапсырыс қабылдап, төлем жасалғаннан кейін, тауарды жеткізбеген әрі қаражатты қайтармаған. Салдарынан 41 тұрғынға жалпы сомасы 5 миллион теңгеден астам шығын келтірілген.
Қазір департамент жәбірленушілердің мүддесін қорғап, кәсіпкерге қатысты сотқа талап арыз берген. Ведомствоның мәліметінше, биыл мұндай қоғамдық резонанс тудырған шағымдар алғаш рет тіркеліп отыр.