Шығыс Қазақстан облысының Марқакөл ауданындағы Ақжайлау және Ұрынхайка ауылдарының арасындағы автожолға шыққан аюды куәгерлер видеоға түсіріп алды.
Куәгерлердің айтуынша, жануар өтіп бара жатқан көліктер мен мотоциклшілерге агрессия танытпаған. Алайда олардың пікірінше, аю әлсіреп қалғандай көрінген және көмекке мұқтаж болуы мүмкін.
Марқакөл ауданының әкімдігі оқиға орнына Марқакөл орман шаруашылығы мен полиция бөлімінің қызметкерлері барғанын хабарлады. Алдын ала мәлімет бойынша, аю таулы аймаққа қарай бет алған.
Орман шаруашылығының мәліметінше, зардап шеккендер жоқ. Тұрғындардың өмірі мен денсаулығына қауіп тіркелмеген. Жағдай құзырлы қызметтердің бақылауында.
Аудан тұрғындары мен қонақтарынан сақтық шараларын сақтау, жабайы жануарға жақындамау, оны тамақтандыруға немесе қууға әрекет жасамау сұралады. Сондай-ақ таңғы және кешкі уақытта орманды алқаптарда серуендеуден уақытша бас тарту қажет.
