«Семей орманы» мемлекеттік орман табиғи резерватының Бородулиха филиалына қарасты Камышен орманшылығының 57-орамында орман өрті әлі сөндіріліп жатыр. Алдын ала мәлімет бойынша, тілсіз жау 60 гектарға жуық аумақты шарпыған.
Өртті сөндіруге Төтенше жағдайлар, Экология және табиғи ресурстар, Ішкі істер, Қорғаныс, Денсаулық сақтау министрліктерінің, Ұлттық қауіпсіздік комитетінің және Абай облысы әкімдігінің күштері жұмылдырылды.
Оқиға орнында барлығы 600 адам жұмыс істеп жатыр. Мамандар 148 бірлік жерүсті техникасы мен жеті тікұшақты пайдаланып жатыр. Барлық бөлімше өрт аумағына жетіп, өздеріне жүктелген міндеттерді орындауға кірісті.
Авиация жалпы көлемі 89 тонна суды 81 рет төкті. Өрт шыққан ауданға Абай, Шығыс Қазақстан және Павлодар облыстарынан, сондай-ақ Астанадан қосымша бөлімшелер жіберілді. Өртті сөндіруге «Семей орманы» резерватының, «Ертіс орманы» орман шаруашылығының қызметкерлері және Төтенше жағдайлар министрлігінің әскери бөлімі де қосылды.
Құтқарушылар полициямен және Абай облысының әкімдігімен бірлесіп, «Дос-болLike» лагеріндегі балалар мен қызметкерлерді алдын ала эвакуациялады. Семей қаласына 220 адам жеткізілді. Олардың арасында 190 бала және лагерьдің 30 қызметкері бар.
Іс-қимылды үйлестіру үшін Қазақстан ТЖМ Стратегиялық жоспарлау және жедел басқару орталығының базасында жедел штаб құрылды. Оның жұмысына жұмылдырылған барлық мемлекеттік органның өкілдері қатысып жатыр. Штаб жерүсті бөлімшелері мен авиацияның жұмысын үйлестіріп, өртті одан әрі сөндіру бойынша шешімдер қабылдайды.
Полиция қауіпті аумақты қоршауға алып, өрт ошағына апаратын жолдарды жапты. Сонымен қатар тәртіп сақшылары өрт сөндіру, инженерлік және басқа да арнайы техниканың кедергісіз өтуін қамтамасыз етіп, қоғамдық тәртіпті қадағалап жатыр. Эвакуация кезінде тұрғындар қалдырған мүлік те күзетке алынды.
Барлық қызметтің бірлескен жұмысының арқасында Камышенка ауылына төнген қауіп сейілді. Мамандар өртті әуеден және жерден сөндіруді, сондай-ақ оны оқшаулап, толық жою жұмыстарын жалғастырып жатыр.
Жағдай Қазақстан ТЖМ жедел штабының бақылауында.
